今日係國慶﹐建國六十年﹐點都要寫篇文去紀念一下啦!
我清楚﹐對好多香港人來講﹐呢一日心情會好矛盾﹐尤其係對一堆所謂懼共﹐或者自稱反共之人。
呢種人﹐我清楚﹐在sinablog入面﹐不在少數。
不過﹐對我來講﹐我則覺得幾高興。原因﹐無他﹐高興就係高興。
你問我愛唔愛國﹐我唔識答你﹐我亦唔會好似有D人一樣﹐將人應唔應該愛國﹐當作乜春學術課題。
我只係知道﹐我係一個中國人﹐我鄉下係福建福清﹐香港係我第二個家。
我希望所認識嘅每一個人﹐乃至我唔識嘅香港人﹐乃至我唔識嘅福建郎﹐乃至其他鄉下嘅中國人﹐都唔需要捱窮﹐可以生活得快快樂樂﹐可以食安樂茶飯﹐一家人平平安安。
當國家出現天災﹐我會有一種衝動﹐去幫助果度嘅人。雖然我未必幫到每一個人﹐但我都會嘗試盡力。
當聽到國家傳出一D負面新聞﹐我會想知道﹐如果係屬實﹐心入面會覺得唔舒服﹐然後希望將來會有辦法﹐作出改善。
感覺就好似你對待你自己親人﹑或者兄弟﹑或者你相熟嘅鄉里一樣。
如果呢D叫愛國的話﹐咁就叫愛國囉﹖
其實﹐我有時都明白﹐點解有D香港人會有矛盾心態。
歸根究底﹐我覺得﹐係因為佢地好多已經無咗鄉土心態﹐尤其係同我同年紀嘅香港人。
籍貫﹐對佢地來講﹐只係表格上要填嘅一個欄目。
家鄉話﹐唔好話識得講﹐就算識得聽嘅﹐都係絕對少數。
認識大陸﹐途徑唔係靠新聞﹐就係靠旅行﹐或者北上消費﹐或者北上工幹。
對部份人來講﹐佢地對大陸嘅印象﹐其實係瞎子摸象﹐或者係加以想象。
一個人﹐如果同一個地方﹐從根本上無連繫﹐要同佢地講感情﹐基本上只係得啖笑。
即使係有感情﹐其實都只不過係一種虛幻嘅感覺。
更加唔好講話愛。
好叉多人講好叉多道理﹐乜春民族﹑乜春文化﹑乜春自由民主﹑乜春共產黨國民黨﹑乜春意識形態﹑乜春政治經濟民生﹐一大堆抽象觀念﹐都只不過係文人多大話。
有人竟然會將國家比喻作機器﹐實在係荒天下之大謬。
國家者﹐家之所在地也。家者﹐血脈相連者﹐方能成家也。你關心家人﹐不止源于血脈相連﹐仲要有所接觸﹐先會產生感情。
你愛國﹐因為家在。當國家被入侵﹐你衛國﹐因為要保家。
問題係﹐當一個地方入面﹐根本無你真正關心嘅人。鄉土之血脈﹐只係你腦入面嘅一堆符號的話。果個地方﹐對你來講﹐只不過係一個異域。
當然﹐我曾經聽過有人批評﹐話我地福建郎只不過鄉土意識太強﹐甚至強到有D封建﹐仲停留係儒家講求嘅“修﹑齊﹑治﹑平”年代。
不過﹐所謂唔封建﹐就係好似有D人﹐連自己祖家個祠堂﹑家山祖墳係邊﹐都唔知道。
我寧願我繼續封建落去。
最後﹐祝願我國繁榮昌盛﹐國泰民安。我家族人﹐五代同堂﹐生活愉快。
陳凱文
寫於2009年10月1日
我都唔知點解
